Steffen Skare (22) er toppkandidaten til Ungdomslista i Utsira kommune. Øykommunen er den einaste kommunen i Noreg som har ei eiga ungdomsliste.
12 ungdommar mellom 18 og 22 år stiller til val for ungdomslista på Utsira utanfor Haugesund.
– Ungdomslista blei starta på initiativ av ordføraren vår, Jarle Nilsen. Tidlegare har det vore vanleg med ei fellesliste og ei bygdeliste på Utsira, ungdommen har vore representert på desse listene, men har som regel hamna så langt nede på lista at me ikkje har hatt nokon sjanse til å bli valde inn. Ungdomslista blei då starta for å gi dei unge betre sjansar til å bli valde inn i kommunestyret, seier ordførarkandidaten Steffen Skare til Framtida.no.
– Det er viktig å ha representantar for ungdommane i kommunestyret, vi bur her ute vi også og bør derfor ha eit ord med i laget. Når vi er eit så lite samfunn som vi er her ute bør alle aldersgrupper vera representerte. Det er som Jarle Nilsen sa til meg, ”I staden for å gissa på kva ungdommane vil her ute, er det betre å få dei med inn i kommunestyret slik at dei har eit ord med i laget”, held 22-åringen fram.
Sjølv er Skare mest opptatt av musikk og kultur.
– Eg er sjømann av yrke, men musikar av hjarte. Elles er eg opptatt av at alle skal vere likestilte, alle skal få den hjelpa dei eventuelt treng og hjelpa skal vere lik for alle. Eg synest òg det er viktig at vi får meir folk ut til Utsira, men for å få det til må det gjerast ting for å få folk til å flytte ut hit, mellom anna må det vere arbeidsplassar, slår han fast.
Kandidatane på Ungdomslista er opptatte av livskvalitet.
– Det er viktig at folk som flyttar ut hit får arbeidsplassar, men det er vel så viktig at dei får ein god livskvalitet her ute, folk skal trivast. Eg trur ikkje at vi unge her ute har meiningar som divergerer noko særleg frå resten av befolkninga, vi er alle opptatte av at Utsira skal bestå, at alle her ute trivst og har gode tilbod og dessutan at vi på sikt får fleire innbyggjarar, meiner Steffen Skare.
