Kommunal- og regionaldepartementet (KRD) går inn med vel ein halv million kroner i støtte til eit nytt antikorrupsjonsprosjekt.
Det er kommunesektorens interesse- og arbeidsgjevarorganisasjon (KS) og Transparency International Norge (TI) som samarbeider om prosjektet, som i fyrste fase skal samarbeida tett med kommunane Oslo og Grimstad.
– Vi vil leggje til rette for ei forvalting i kommunane som byggjer på høg etisk standard og skaper tillit, seier kommunal- og regionalminister Liv Signe Navarsete i ei pressemelding.
Prosjektet har fått namnet Openheit, integritet og antikorrupsjonsarbeid i kommunesektoren. Organisasjonane har som mål å få kartlagt svake punkt i kommunane og risikoområde for korrupsjon. I tillegg vil prosjektet få fram behov for verkty og metodar i arbeidet med å redusera risikoen for korrupsjon i sektoren. Det vil og bli utvikla ei antikorrupsjonshandbok for kommunesektoren.
Tiltaket er i følgje Navarsete verdifullt for satsing på etikk og antikorrupsjonsarbeid i kommunesektoren. – Eg har høge forventningar til kva dei to organisasjonane kan få til, seier kommunal- og regionalministeren.
