Sentralstyremedlem i Høgre, Arne Hjeltnes , vil kjempe mot programkomiteen sitt forslag om å endre mållova. Med seg på det får han fleire Høgre-ordførarar.
– Eg er mot, seier Arne Hjeltnes til Framtida.no om forslaget frå hans eige parti om å endre mållova slik at tilsette i staten sjølv kan velje målform dei ynskjer å bruke.
Les også: – Tilsette i staten bør sleppe å bruke nynorsk
– Det er eit typisk forslag som kjem opp frå folk som trur dei vil gjera seg endå meir populære. Eg håpar folk tar til vitet. Eg vil argumentera mot forslaget, og håpar det ikkje blir noko av, seier Hjeltnes vidare.
Han får støtte frå fleire Høgre-ordførarar.
Ordførar i Aurland Noralv Distad skal sjølv delta på landsmøtet til våren. Han meiner det er naturleg for innbyggjarane å få svar frå staten på den målforma dei bruker.
– Eg trur at nynorsken vil overleva på grunn av sine eigne kvalitetar, og ikkje reguleringar. Men uansett synest eg det er god folkeskikk å svara på den målforma ein får spørsmål på, seier han til nettavisa Framtida.
Bjørn Sandnes, ordførar i Haram, er skeptisk til forslaget til programkomiteen.
– Konsekvensen av dette vil bli at det blir mindre nynorsk, seier han.
Både lnk.no og LNK-avisa kjem attende med fleire kommentarar til utspelet frå Høgre.
