Fylkesordførar i Aust-Agder, Bjørgulv Sverdrup Lund (H), reagerer på partiet sitt utspel om at tilsette i staten bør sleppe å skrive nynorsk. Likevel vil han ikkje halde på sidemålet.
Sverdrup Lund er tidlegare ordførar i nynorsk-kommunen Valle og meiner det er ein innarebeidd praksis at ein i staten svarer på brev i same målform dei som kjem inn i.
– Høgre er i utgangspunktet for valfridom, så slik sett er dette korrekt å tenkje, men når det er sagt meiner eg nynorsk er ein viktig del av identiteten vår, og noko me må halde fast ved, slår fylkesordføraren fast.
Les også: Støttar nynorsk i staten
Han legg vekt på at utspelet frå programkomiteen no skal ut på høyring, og at ein då får høve til å kome fram med motargumenta som har vakna til liv fleire stader i partiet.
– Men det er klart eg ser at nynorsken er på vikande front og under sterkt press mange stader, også i heimkommunen min, Valle. Det er vel kanskje mykje på grunn av det nye mediebiletet vårt, seier han.
– Men dersom dei tilsette i staten skal kunne svare på begge målforer, bør ein ikkje då halde oppe sidemålet i skulen?
– Eg kan forstå at det virkar rart, og at det ikkje er logisk. Men eg har sterk tru på at ein styrkar nynorsken ved å stimulere til auka leseglede istaden for å tvinge elevane gjennom det som valfag. Å halde på sidemålet slik det er i dag trur eg berre vil føre til motvilje mot språket.
Trass i det har han ikkje ei soleklar løysing på korleis ein likevel kan halde dei skriftlege kunnskapene i nynorsk ved like.
– Kanskje bør ein passe på å ha folk med nynorsk kompetanse rundt i kommunane, eller ein kan ha interne kurs. Nynorsk kan også sjølvsagt vere ein del av høgare utdanning, som eige fag.
