Suldalsposten er kåra til årets lokalavis av Landslaget for lokalaviser (LLA).
Størsteparten av lokalavisene i Noreg var i helga samla i Bergen til landsmøte i Landslaget for lokalaviser. Tradisjonen tru delte LLA også i år ut fleire prisar til sine eigne.
Den gjævaste prisen av alle er prisen for årets lokalavis, og i år gjekk han til lokalavisa Suldalsposten. Suldalsposten kjem ut to gonger i veka og dekkjer primært Suldal kommune i Rogaland. Juryen grunngir førsteplassen med at avisa tek vare på historie, identitet og tradisjon, på same tid som ho peikar framover og plasserer seg godt i det nye mediebiletet.
– Gjennom gode retoriske grep, glitrande skribentar og vakkert språk skil ho seg ut som ei avis som på mønsterverdig vis ikkje berre er ein berar av det journalistiske handverket, men også den skriftlege kulturarven, heiter det frå juryen.
Redaktør og dagleg leiar i Suldalsposten Astrid Espeland leier ein redaksjon utan ein einaste mann. Ho gler seg over prisen.
– Dette er eit resultat av lagarbeid over tid. Vi er på mange måtar litt av alt det LLA står for: Samhald, fellesskap, entusiasme og ein stor porsjon vilje til stadig å ta nye steg. Og så er det jo litt moro at alle sju i avisa er kvinner, seier Espeland.
LLAs jury delte også ut heiderleg omtale til Askøyværingen og Våganavisa.
Prisdryss
Andre avisprisar som blei delt ut på landsmøtet i Bergen, var årets lokalavisfoto, som i år gjekk til Anne Jo Lexander i Askøyværingen. Kvinnheringen fekk prisen for årets lokalavisside, marknadsprisen gjekk til Gjesdalsbuen, og LLAs journalistpris til Bernt Ivar Bergum i Hallingdølen.
I tillegg vart Asgeir Olden, tidlegare redaktør i Nynorsk pressekontor og no fagmedarbeidar ved Instituttet for Journalistikk, tildelt LLAs heiderspris. (©NPK)
