Talet på søknadar til Norsk kulturminnefond har nær dobla seg dei siste tre åra. Totalt i år har fondet fått 898 søknadar frå heile landet.
– Det har vore ein jamn vekst i talet på søknadar sidan fondet vart etablert i 2003, men den største auken har komme dei siste åra. Støtteordninga blir stadig meir kjend gjennom aktiv bruk av sosiale medium og informasjonsmøte rundt om i landet, seier direktør Simen Bjørgen i Norsk kulturminnefond.
14 prosent fleire har søkt i år enn i fjor, og 43 prosent fleire enn for to år sidan. Oppland og Hedmark står for høvesvis 118 og 84 søknadar i år.
Kvart år blir 87,4 millionar kroner fordelt til utvalde søkjarar som ønskjer å restaurere kulturminne. (©NPK)
