Verdien skipstunnelen har som turistmål kan aleine finansiere prosjektet, meiner styreleiar Rolf Domstein i Stad skipstunnel.
Domstein meiner det ikkje er eit spørsmål om, men når tunnelen skal byggjast, fortel maritime.no.
I desember skal Kystverket overlevere Samferdselsdepartementet forarbeida dei har gjort til forprosjektet for skipstunnelen. Torsdag og fredag var politikarar, næringslivsrepresentantar og andre interesserte samla til konferanse om Stad skipstunnel.
Tunnelen er tenkt bygd mellom Moldefjorden og Kjødepollen i Sogn og Fjordane for at skip skal sleppe å krysse det vêrharde Stadhavet. Det er frå regjeringshald løyvt pengar til eit forprosjekt i 2015 og Stortinget har også sett av 1 milliard til prosjektet i Nasjonal transportplan 2014– 2023. Totalkostnaden er sett til kring to milliardar kroner, ifølgje maritime.no. (©NPK)
