Kommunestyret i Tysnes i Hordaland vedtok onsdag med 13 mot 8 stemmer å seie nei til ei samanslåing med nabokommunane Os og Fusa.
Vedtaket er eit nederlag for Tysnes-ordførar Kåre Martin Kleppe (H), som har gått inn for ei slik samanslåing. Han fryktar at kommunen blir vel liten med fleire storkommunar rundt seg.
– Reint økonomisk klarer vi oss heilt greitt åleine. Men viss vi ser det i samanheng med regionsreforma som kjem etter kvart, så ser eg at vi blir litt små i framtida, seier Kleppe til NRK.
Kommunestyra i både Os og Fusa har samrøystes vedtatt å gå vidare med samanslåingsplanane. Dei må no sjå vekk frå Tysnes i det vidare arbeidet. (©NPK)
