Pilotprosjektet Nye tider – ny norsk har utvikla kortspelet Kamp som snart er klart til bruk. Spelet set fokus på nynorsk litteratur.
Prosjetkleiar Bente Dammen ved Osterøy bibliotek fortel at spelet snart skal prøvast ut saman med Høgskulen i Bergen, og så reknar ein med at det kan takast i bruka av skular og bibliotek neste år.
Spelet er eit 4-kortspel, kor korta har bilete og informasjon frå ulike nynorske barnebøker. Det har fleire nivå, og når ein spelar kjem opp i kamp med ein annan, er det om å gjere å kjenne til namn på folk i den aktuelle boka, forklarar Dammen. Bøkene som blir omtala på korta er ei blanding av ny litteratur, kjende bøker som kjem i parallellutgåver og klassikarar.
– Her finn du alt frå Drakeguten av Asbjørn Rydland til Gummi-Tarzan og bøker av Roald Dahl, seier bibliotekaren. Målet med spelet er at det skal gi barna gode assosiasjonar til bøker og stimulere dei til å lese bøkene på korta. Spelet er utvikla for barn mellom 10 og 12 år.
Prosjektet Nye tider – ny norsk starta opp i 2008 og er utvikla av LNK som eit pilotprosjekt.
