Samlaget legg no fram vårlista med blant anna nye bøker frå Agnes Ravatn, Ragnar Hovland og Lars Mæhle.
Fleire etablerte forfattarar kjem med nyutgjevingar på Samlaget denne våren. Agnes Ravatn har studert vekeblada og prøver å vise lesaren i boka Folkelesnad kva desse blada vil med oss. Ragnar Hovland kjem også med ei ny essaysamling der han fører oss inn i forfattarskapane til Dickens, Brautigan, Dylan Thomas, Edgar Allan Poe og andre.
Besett av kjærleik
Lars Mæhle kjenner truleg dei fleste som barne – og ungdomsforfattar. No kjem han derimot med si første vaksenbok. I boka Korea. Noveller om kjærleik går handlinga føre seg på industristaden Sunndalsøra. Boka handlar i store trekk om menneske som på ulikt vis er styrte eller besette av kjærleik.
No kjem også Olav H. Hauge sine dagbøker i ei kortutgåve. Her får me Hauge sine eigne tankar om fruktdyrking, verdslitteratur og kvardag.
Brevsamlinga med brev som han og kona Bodil Cappelen har sendt kvarandre kjem også no i ny drakt.
Venstrevridd pressehistorie
Samstundes har journalist Alf Skjeseth skrive pressehistoria til Klassekampen. Ei historie om avisa som har utvikla seg frå revolusjonær propagandaavis til kultureliten og venstresida si dagsavis.
For dei minste presenterer no Samlaget blant anna ein ny norsk peikebokserie som heiter Mopp og Mikko av illustratøren og forfattaren Kari Stai.
