Sjukehusaksjonen Nordfjord vil gå til rettssak for å få stoppa avvikling av ortopediavdelinga ved sjukehuset i Nordfjord.
Styremedlem Jan Eide i aksjonen seier til avisa Firda at det kortsiktige målet med ei rettssak er å få ut ei rettsavgjerd som gjer at Helse Førde må utsetje avviklinga av ortopedien ved Nordfjord sjukehus.
– Advokaten vår er klar på at me har ei sterk sak. No skal me handle så raskt som mogleg for å få stoppa nedlegginga før det er skjedd stor skade, seier Eide.
Helse Førde bestemte i sommar å leggje ned ortopediavdelinga i Nordfjord. Sjukehusaksjonen skriv i ei pressemelding at dette inneber at Nordfjord sjukehus innan utgangen av 2011 vil vere eit sjukehus utan kirurgiske aktivitetar.
– Dette er heilt klart i strid med dei føringane som regjeringa og Stortinget har lagt, om kva eit lokalsjukehus med akuttfunksjonar minimum skal innehalde, skriv aksjonen. (©NPK)
