Fem veker etter skulestart har Ingvild Elisabeth Fagereng på Moheia vidaregåande skule enno ikkje fått skulebøkene sine.
Fagereng har nynorsk som hovudmål og skulen har bestilt bøker på nynorsk til ho. Men enn så lenge må ho bruke bokmålsbøker. Til Rana blad seier Fargereng at ho gav beskjed til lærarane sine om språkvalet første skuleveka, og ho har mast på dei om bøkene etter det. Sidan har ho kontakta studierektor for å få fortgang i sakene, og no har ho også kontakta Norsk Målungdom for å få råd og hjelp.
Fagereng reagerer i tillegg på at ein norsklærar har kome med negativ kommentar til nynorsken og at ho ikkje har fått tatt kartleggingsprøve på nynorsk.
– Læraren sa den ikkje eksisterer på nynorsk, noko eg veit at han gjer, seier ho til Rana Blad. – Det var liksom vanskeleg kvar gong eg ville ha noko på nynorsk og det opplever eg som provoserande og demotiverande.
Rektor Kaia Erlandsen ved Polarsirkelen, som Moheia høyrer til, beklagar at ikkje Ingvild Elisabeth Fagereng har fått bøkene sine. Trass i at Fargereng har gitt beskjed til lærarane sine, har ikkje studierektor ved Moheia fått beskjed før for halvanna veke sidan. No er bøkene bestilt, seier Erlandsen.
Rektor er ikkje kjend med at Fagereng har klaga på ein av lærarane sine.
