Saman skal dei fire vestlandsfylka finne ut korleis ein kan få meir pengar ut av cruiseturismen, også på land.
Vestlandet tek imot kring 70 prosent av all cruisetrafikk her i landet, og dei siste åra har trafikken auka kraftig, skriv Stavanger Aftenblad. Likevel, enkelte hevdar at turistane ikkje legg att meir pengar på land enn dei må. Det blir også vist til at skipa forureinar gjennom utslepp og avfall, dessutan kan overfylte turistattraksjonar og trengsel òg by på utfordringar.
Dei fire fylkeskommunane Rogaland, Hordaland, Møre og Romsdal og Sogn og Fjordane har saman jobbe fram ein forstudie for å prøve å møte utfordringane. Forstudien konkluderer med at det trengst ein felles plan for å styre cruiseutviklinga i regionen.
Ifølgje Aftenbladet meiner arbeidsgruppa at cruiseverksemda i større grad bør regulerast og styrast av norsk reiselivsnæring, ikkje av cruise-reiarane.
Arbeidsgruppa meiner ein i den felles planen bør setje ei øvre grense for dagleg trafikk på dei ulike destinasjonane. Dei foreslår også å løfte spørsmålet om ei passasjeravgift til nasjonalt nivå og meiner regionen bør jobbe for å gjere landsstraum til eit nasjonalt prosjekt. I tillegg meiner arbeidsgruppa at ein gjennom planen bør arbeide for at aktuelle hamner i regionen kan få status som snuhamner, ifølgje Aftenbladet. (©NPK)
