Etter sist kommunestyreval fekk 72 kommunar mindre enn 30 prosent kvinner i kommunestyra. Det vil regjeringa gjere noko med.
Desse 72 kommunane blir no inviterte til å delta i prosjektet Lokalvaldagen. Gjennom prosjektet får kommunen tilbod om ein gjennomgang av kjønnsbalansen i dei lokalpolitiske organa sin og dei vil få besøk av ein forskar som vil forklara kvifor nominasjonprosessane, stemmetillegg og topplass på listene er så viktige for å oppnå kjønnsbalanse. Vidare skal dei få besøk av ein lokalpolitikar frå ein kommune som har hatt tilsvarande utfordringar før, men som har greidd å oppnå kjønnsbalanse i løpet av berre ein valperiode etter å ha vore med i prosjektet Utstillingsvindauge for kvinner i lokalpolitikken.
– Det er meir enn hundre år sidan kvinner fekk stemmerett, og rett til å erobre kommunale verv på lik linje med menn. Likevel er kjønnssamansetjinga i norske kommunestyre skeiv. Ved hjelp av Lokalvaldagen håper me å gjere eit historisk byks når det gjeld kvinnedelen i kommunestyra etter neste lokalval, seier kommunalminister Liv Signe Navarsete (Sp) om prosjektet som vil bli gjennomført i god tid før nominasjonsprosessane startar opp lokalt.
