– Bokbåten Epos er framleis viktig, men drifta bør gjerast meir framtidsretta, meiner fylkestinget i Sogn og Fjordane.
– Det er stor semje om at bokbåten har ein viktig funksjon som ein liten kulturbåt, men det er behov for å sjå på ordninga og gjera denne meir framtidsretta, seier Åshild Kjelsnes (Ap) i ei pressemelding frå fylkeskommunen.
På møtet i fylkestinget nyleg vart det vedteke å auka løyvinga til vidare drift av bokbåten med 800.000 kroner. Samstundes skal ordninga med bokbåten evaluerast innan tre år.
Kjelsnes meiner det er viktig at bokbåten blir meir tilpassa den tida vi lever i.
– På enkelte område konkurrerer bokbåten i dag med landbiblioteka, og dette må vi justera. Bokbåten er eit unikt tilbod og må nyttast til å gje gode tenester der det er behov for det, seier Kjelsnes. (NPK)
