Bergen Høgre ønskjer at Bergen skal bli eit eige fylke, slik som Oslo.
– Vi ønskjer å gjennomføre ei prøveordning med fylke utan Fylkesmann, og at Hordaland fylke skal vere eit av desse, seier lokallagsleiar i Bergen, Harald Victor Hove, til NRK. Resolusjonen vart vedteken på årsmøtet til lokalpartiet i helga, og Hove meiner Bergen har same føresetnader som Oslo til å utøve mynde i saker som til dømes gjeld skule og kollektivtrafikk. Partiet meiner kommunane blir fråtekne for mykje råderett i seinare tid, og ønskjer på denne måten å sikre større lokalt sjølvstyre.
