Litteraturkrefter i Odda ønskjer å gjere Lindehuset og det gamle sentralbadet på smelteverket i Odda om til eit litteraturhus.
Husa skal mellom anna romme kultursalar, filmstudio, eit bokbad med plass til 150 publikummarar, kafé, lyttedusjar og bokutsal. Husa er ein del av smelteverket som la ned i 2003, og Lindehuset er i dag ein sentral arena for Litteratursymposiet i Odda.
– Vi håper dette kan bli eit fleirbrukskulturhus, sa leiar for Litteratursymposiet, Marit Eikemo, då ho presenterte planane under Diktarveg-konferansen i Balestrand. Ho meiner huset vil få heilt andre kvalitetar enn det etablerte Litteraturhuset i Oslo.
– Vi har ein unik kombinasjon av industrihistorie, flott natur og samtidslitteratur forankra i Odda.
Litteraturhuset og bokbadet har førebelse kostnadsrammer på til saman 76,2 millionar kroner, ifølgje Hardanger Folkeblad.
Det nye litteraturhuset blir ein del av ei større satsing på litteratur og skrivekunst i samspel med industrien i Odda. Odda vil tilby ein forfattarbustad i Murboligen, byggverket som er udødeleggjort i Frode Gryttens roman Bikubesong. Det er og planar om å opprette eit skrivekunstmiljø på vidaregåande- og høgskulenivå.
Odda har arrangert litteratursymposium årleg sidan 2002. Det som starta som eit lokalt arrangement har no vekse seg langt ut over kommunegrensene. Symposiet dobla besøkstala sine frå 3 000 i 2008 til 6 000 i 2009.
