Fylkesordførar Åshild Kjelsnes i Sogn og Fjordane er stolt av prisen Årets nynorskkommune, og meiner han er til inspirasjon i det vidare arbeidet.
– Dette betyr at arbeidet vårt vert verdsett. Det er ein pris eg er kry over at fylket vårt har fått. Prisen er ei stor inspirasjonskjelde for alle som er opptekne av det flotte nynorske språket, og som vil det skal ha ei levande og rik framtid, seier ho i ei pressemelding.
Les også: Sogn og Fjordane er Årets nynorskkommune 2012
Kjelsnes er oppteken av at Sogn og Fjordane har ei spesiell rolle som nynorskfylke. Rapporten «Språkfakta Sogn og Fjordane 1646–2012» viser at nynorsken står sterkt, og at nynorskbruken er stabil i Sogn og Fjordane.
Les også: Vil fremje språkglede
– Vi har ei spesiell rolle som nynorskområde, og det forpliktar. Vi ser klåre tendensar til ei utvikling som må møtast med tiltak om vi vil at nynorsken skal ha ei like sterk rolle her i framtida. Fylkesrådmannen vil blant anna lage ein eigen språkbruksplan for fylkeskommunen for at vi skal vere bevisste på rolla vår, fortel ho.
