Knut Arild Hareide vil fornye undervisninga for å få fleire positive haldningar til sidemålet.
– Kva blir den viktigaste språksaka fram mot Stortingsvalet 2013?
– Det er å styrke skulen slik at alle har grunnleggande lese- og skrivekunnskapar når dei går ut av grunnskulen.
– Kva blir den viktigaste nynorsksaka?
– Å fornye undervisning og prøveformer for å medverke til ei meir positiv haldning til sidemål i heile landet.
– Kva tenkjer du om framtida til sidemålet og sidemålskarakteren?
– Det er avgjerande at vi klarer å skape gode haldningar til nynorsk for å sikre forståing for to jamstilte målformer og sidemålsundervisning.
– Kva tenkjer du om mållova? Bør ho bestå?
– Hovudtrekka bør bestå, men vi er opne for å vurdere om dei einskilde føresegnene i lova kan ivaretakast i andre lover. For KrF er det resultatet som er viktigast.
– Kva trur du blir den viktigaste utfordringa for nynorskkommunane framover?
– Å rekruttere medarbeidarar som både er gode på sitt fagfelt og samstundes skriv god nynorsk.
– Korleis påverkar språksakene eit eventuelt regjeringssamarbeid etter valet?
– Sondering og drøfting av eit eventuelt regjeringssamarbeid omfattar ei totalvurdering av alle viktige saker. Språksakene er ei av desse.
Me utfordrar partileiarane på Stortinget på kva dei meiner blir den viktigaste språksaka fram mot Stortingsvalet 2013. I dag: Knut Arild Hareide (KrF)
