Snart kan telefonen din omsetje samtalen din mens du snakkar. Det opnar for nye bruksområde for dei smale språka, seier framtidsforskar.
Teknologiske nyvinningar er med på å bryte ned barrierar og gjer utryddingstruga språk mindre truga, seier framtidsforskar Klaus Mogensen ved Copenhagen Institute for Futures Studies i København.
Telefon
Den konkrete teknologien han snakkar om her, er ein applikasjon til mobiltelefonar som kan omsetje ein samtale frå engelsk til norsk. Applikasjonen er snart klar for Google Android-telefonar, men i første omgang er det nok dei store språka som engelsk og spansk som blir tilgjengelege.
– Når vi kan bruke telefonen til å omsetje til fleire språk, så vil vi kunne bruke dei smale språka meir. Posisjonen deira blir ikkje lenger så truga, seier Mogensen.
Omsetjing
Det har skjedd mykje på området automatisk omsetjing av språk på datamaskinar dei siste åra, og Mogensen peiker på at tenester som Google Oversett, som set om nettsider til meir enn 50 språk, stadig blir betre og betre.
– Google Oversett er ikkje perfekt, men slike tenester er brukarstyrte. Jo fleire som brukar det, jo fyldigare blir tenesta.
Klaus Mogensen er framtidsforskar og forfattar. Han jobbar også med kva potensial teknologi har, og kva teknologi har å seie for samfunnet og måten vi lever på. For tida jobbar han med ein studie om anarconomy, om korleis nettverkssamfunnet i stigande grad utfordrar tradisjonelle forretningsmodellar. Korleis snakkar vi saman i framtida? er temaet for foredraget som han skal halde på LNK sitt landsting i april.
