Lokalpolitikarar og opposisjonspolitikarar er ikkje nøgde med at det er bilistane sjølve som må ta størstedelen av rekninga når vegar blir bygde og rusta opp.
Ifølgje ein gjennomgang NRK har gjort må bilistane ut med over seks av ti vegkroner. Dette tilsvarer 15 av totalt 25 milliardar kroner, som 15 nye bompengeprosjekt vedtatt av Stortinget kjem til å koste.
– Bompengeandelen er så høg nå at det ikkje lenger kan kallaste eit reelt spleiselag. Dette er tvangskjøp av veg på avbetaling. Renter og driftskostnader gjer at samla innbetaling for bilistane nærmar seg det det kostar å byggje prosjektet, seier stortingsrepresentant Arne Svortevik (Frp) til NRK.
Bømlo kommune i Sunnhordland har eitt av dei 15 nye vegprosjekta som Stortinget har gått inn for. Vegane i øykommunen skal bli rusta opp for over ein milliard kroner. Det er meininga at vegbrukarane skal ta 65 prosent av rekninga for dette arbeidet.
– Eg er uroa over at ein stadig større del av rekningane hamnar hos bilistane, seier Bømlo-ordførar Inge Reidar Kvalvåg (H).
Stortingspolitikar Magne Rommetveit (Ap), som kjem frå nabokommunen Stord der han tidlegare har vore ordførar, synest ikkje det er eit problem at bilistane må ta ein stor del av rekninga.
– Når ein ser dei gode resultata, synest eg det er rett og helt greitt, seier Rommetveit til NRK.no.
