Sju av ti som har bestemt seg, seier nei til at Noreg skal bli EU-medlem, ifølgje ei måling Respons har laga for Aftenposten.
Mai-målinga viser at 71 prosent seier nei til EU. 29 prosent seier ja. Tala er nærast uendra sidan mai i fjor, då 70 prosent sa nei og 30 prosent sa ja.
Ser vi på alle veljarane, fordeler tala seg slik: 62 prosent seier nei til EU, 25 prosent seier ja, medan 12 prosent er usikre på om Noreg skal bli EU-medlem.
Målinga har ein feilmargin på mellom 2 og 3 prosentpoeng.
Fordelt på partipreferansar viser det seg at det no er fleirtal mot medlemskap blant Høgre-veljarar. 59 prosent av Høgre-veljarane som har gjort seg opp ei meining om EU, seier nei, medan 41 prosent seier ja til EU.
Blant dei andre partia er ja-oppslutnaden høgast blant dei som stemmer på Arbeidarpartiet, Venstre og Framstegspartiet, med rundt 35 prosent. Blant dei som stemmer på Senterpartiet og Raudt er nei-delen på 100 prosent. Blant Sosialistisk Venstreparti-veljarane svarar 98 prosent nei til EU. (©NPK)
