Programmet for Nynorske litteraturdagar i Aurland siste helg i oktober er no klart.
Tidlegare språkråddirektør Sylfest Lomheim skal opne festivalen fredag kveld. Lomheim får følgje av poeten Jon Hjørnevik og musikarane Sigrid Moldestad og Liv Meret Kroken som saman utgjer duoen Spindel-duo. Fredag blir det også møte med NRK-journalisten Erling Lægreid som gir ut ny bok i desse dagar.
For barna
Laurdag er den store festivaldagen, og då er det dei unge som skal få sitt. Barn og unge er ei viktig målgruppe for festivalen, seier arrangørane, og denne dagen kan dei få treffe forfattarane Lars Mæhle og Maria Parr. Båe to har hatt stor suksess med film og bøker dei seinare åra. Lars Mæhle er mest kjend for boka Keeperen til Tunisia som seinare har blitt til filmen Keeper´n til Liverpool. Maria Parr har hatt suksess både i Noreg og i utlandet med sine bøker, og boka Vaffelhjarte skal no bli barne-tv.
Etter møtet med forfattarane er det tid for Operabarnetimen, fanfaronenes superoperashow, eit laussleppt operashow for barn.
Åresong og Pop-quiz
Sylfest Lomheim skal engasjere dei vaksne med ein frukostprat på laurdag. Sidan vil det handle om lesebrett og e-bøker, det blir foredrag om Hulda Garborg og publikum kan få innblikk i livet til kvinner under krigen, både dei som deltok i motstandskampen og dei som var ein del av Rinnanbanden. Forfattarane Ragnar Hovland og Lars Ove Seljestad kan du treffe denne laurdagen, og skulle det freiste med litt musikk, vil Gabriel Flilfet og hans orkester framføre Tingingsverket frå festspela i Bergen 2010. Åresong heiter verket, og det er basert på tekstar av Jon Fosse.
Laurdagen avsluttar med ein popquiz kor Ragnar Hovland og Finn Tokvam er vertar.
Musikalsk avslutning
Dei nynorske litteraturdagane avsluttar søndag med eit møte med ein lokal krimforfattar og møte med Egon Askvik & co. i Vangen kyrkje. Heilt til slutt blir det avslutningskonsert med Rita Eriksen med orkester.
Dei nynorske litteraturdagane i Aurland blir i år arrangert for 6. gong. Det er Aurland kommune som står bak Nynorske litteraturdagar og litteraturfestivalen kom til som ei vidareføring av allereie etablerte kulturtiltak i kommunen.
