Over 140.000 har vore innom nyhende- og debattavisa for unge sidan starten 1. september i fjor.
Sidan starten har over 140.000 unike brukarar vore innom den nynorske nettstaden. Framtida.no har opplevd vekst sidan starten, og har dei siste vekene hatt rundt 10.000 unike brukarar i veka.
Framtida.no har satsa tungt på å dekkje lokalvalet, og har opplevd stor interesse frå lesarane. «Valgomaten» til Framtida, som er den første i Noreg på nynorsk, blei brukt over 20.000 gongar.
– Det er kjekt at fleire av sakene våre har spreidd seg i sosiale media, og me ser òg at sakene våre har skapt overskrifter i andre media. Det viser at me klarar å nå gjennom med journalistikken vår, seier Svein Olav B. Langåker, prosjektleiar for Framtida.no, til avisa Hordaland.
Etter å ha fått støtte frå Vinjefondet ved nyttår, tilsette Framtida.no to reisande journalistar i deltidsstillingar i vår for å setje søkjelys på kva ungdom er opptatt av før valet.
I juli byrja Framtida.no å abonnere på nyhende frå Nynorsk pressekontor. I tillegg til eigne saker har Framtida.no avtale med 11 lokalaviser, Dag og Tid, Magasinett, LNK.no og studentavisene i Oslo, Bergen og Trondheim .
Nettavisa Framtida.no vart til gjennom eit samarbeid mellom ABC Startsiden, Landslaget for lokalaviser og Landssamanslutninga av nynorskkommunar. Kulturdepartementet, Mot til å meina, Magasinett og Pirion støttar òg prosjektet.
