Fire grensekommunar vest i Aust-Agder har allereie søkt seg til Vest-Agder. Nå kan grensekommunar i aust også kome til å søkje fylkesbyte.
Påtroppande Gjerstad-ordførar Kjell Trygve Grunnsvoll frå Senterpartiet trur at Aust-Agder er i ferd med å bli splitta opp. Sjølv ser han austover.
– Søknadene frå kommunane som søkjer seg mot Vest-Agder, gjør at vi ser meir mot aust. Det er det inga tvil om, seier han til NRK Sørlandet.
Fleire av kommunane aust i Aust-Agder vil kunne følgje Gjerstad.
– Viss Kommunal- og regiondepartementet skulle seie ja til søknadene frå Lillesand, Iveland, Birkenes og Evje og Hornnes kommune, er det også naturleg for oss å sjå mot Telemark igjen, seier ordføraren i Åmli, Reidar Saga.
Anja Hjelseth som er politisk rådgjevar i Kommunal- og regiondepartementet, legg ikkje skjul på overfor NRK at det som nå skjer i Aust-Agder er ei vanskeleg sak for departementet.
– Det er klart at dette ikkje er noko enkel sak. Det viktigaste for oss er at vi får sjå heilskapen og at vi har ei ordentleg utgreiing av kva dette betyr for Aust-Agder som fylke, seier ho.
