Bergetippen barnehage i Aukra jobbar med nynorsk språkstimulering og auka leseglede hjå dei små.
Barnehagen har nyleg delteke i eit prosjekt i regi av Nynorsksenteret i Volda, kor føremålet er å gjere vaksne og barn bevisste på den nynorske litteraturen og språket via bokavtalar, nettspel og tips om formidling av litteratur. Dette året skal dei eldste barna i barnehagen bli kjende med ei ny bok kvar månad, og bøkene skal presenterast i i eiga avis, Solsikkenytt. Målet er å fremje glede over å bruke språket og lese bøker, heiter det i Aukra kommune si kommuneavis.
– Bergetippen har arbeidd mykje med identitet gjennom tema nærmiljø, bygda mi og kommunen min. Språk er nært knytt til identitet og må lærast tidleg. Dei fleste barn i barnehagen skal bruke nynorsk når dei tek til på skolen, så målet med prosjektet er mellom anna at barna skal vere fortrulege med nynorsk når dei tek til i 1.klasse, seier styrar Brit Drejer i avisa.
Aukra kommune har nynorsk som administrasjonsspråk og vart medlem i LNK tidlegare i år.
