Nok ein festival som bruker nynorsk er kåra til Årets rockefestival.
Bygdalarm i Øystese i Hardanger er kåra til Årets festival av Norsk Rockforbund, skriv Framtida.no.
I skrivet frå Norsk Rockforbund heiter det:
«Vinneren er en festival som med sin tydelige og unike identitet har markert seg som en fargeklatt i faunaen av norske festivaler. De har hatt tro på det litt odde konseptet sitt, og har blitt svært anerkjente for å bruke lokale matvarer og lokale tradisjoner på en ny og moderne måte.»
Sjølv skriv arrangørane om festivalen sin at han er «tufta på deilegpop og fenalår».
Festivalen har sidan starten i 2007 skapt store ringverknader for lokalmiljøet, og med masse humor og ei rekkje snedige tiltak har festivalen fått mykje merksemd både på lokalt, regionalt og riksnivå. Festivalen har vågd å satse på ein spennande bookingprofil og servert eit svoltent publikum både små og store, norske og internasjonale band frå forskjellige sjangrar. I tillegg har dei stått for ein edrueleg og økonomisk drift, noko som Norsk Rockforbund synest er spesielt positivt.
Festivalen runda 3000 besøkjande i sommar.
– Vi håper denne prisen kan inspirera festivalen til å halde fram det gode arbeidet sitt. Prisen er ei stadfesting for godt arbeid frå kollegaer i festivalbransjen. Så sjølv om vi ikkje deler ut ein stor pengesjekk, så betyr denne prisen tradisjonelt mykje for medlemmane våre. Bygdalarm har sidan starten vore ein fargeklatt, og me gler oss til fortsetjinga, seier konstituert dagleg leiar i Norsk Rockforbund, Lars Tefre Baade, til heimesidene deira.
I løpet av dei åtte åra rockeforbundet har delt ut pris, har prisen gått til fire festivalar som brukar nynorsk. Tidligare vinnarar av årets festival: 2004: Malakoff, 2005: Malakoff og Bukta, 2006: Vinjerock, 2007: Storåsfestivalen, 2008: Skral Festival, 2009: Slottsfjell og 2010: Buktafestivalen.
Som eit døme på andre prissette nynorsk-festivalar kan vi nemne Rock n’ LOL-festivalen på Søfteland i Os. Denne festivalen fekk tidlegare i haust Bergens Tidende sin pris Bergens Beste Festival. For sin nynorsk-innsats fekk dei også målprisen frå Os Mållag i førre veke.
