Fredag skreiv Kommunalbanken under på ei forlengd avtale med Landssamanslutninga av nynorskkommunar (LNK). Den nye avtala gjeld heilt fram til 2016.
– Vi er godt nøgde med samarbeidet vi hatt med LNK sidan 2003. Gjennom dette samarbeidet får vi møte mange kommunar som ei gruppe, samstundes som vi møter kommunane på ein litt annan måte enn vi vanlegvis gjer. Vi møter også andre typar representantar frå kommunane enn vi gjer til vanleg, seier Kjell Pettersen, som er leiar for kommunikasjon og HR i Kommunalbanken.
– Vi liker også det store innslaget av kultur som LNK står for. Det er nyttig å vere samarbeidspartnar med LNK, og vi gler oss til å halde fram med dette samarbeidet, legg han til.
– Kva inneber det vidare samarbeidet for Kommunalbanken?
– Det inneber at vi spyttar inn ein del midlar i LNK kvart år mot at vi får delta på arrangement og profilere oss på trykksaker og anna. At vi får vere til stades på LNK sine møtestader, seier Pettersen.
Også dagleg leiar av LNK, Vidar Høviskeland, er godt nøgd med at Kommunalbanken ønskjer å vidareføre samarbeidet.
– Det er viktig for oss å samarbeide med solide aktørar, som Kommunalbanken, KLP Forsikring og Fagforbundet. Ein ting er at dei gjev oss midlar, ein annan ting er goodwillen samarbeidet gjev oss, slår Høviskeland fast.
Bondeheimen har også forlengd samarbeidsavtala si med LNK, fram til 2014.
