Bibliotekleiar Bente Dammen i Osterøy vil anbefale ei bok som ikkje er så mykje omtala frå før.
Namn: Bente Dammen
Jobbar med: Bibliotekleiar Osterøy kommune
Kva bok vil du anbefale i sommar: Dagen om natta av Berit Vatne Vik
Kva er det med denne boka som gjer at du vil anbefale ho:
Det er ei perle av ei bok, men ho er knapt nok omtala av journalistar eller bokmeldarar. Ho handlar om Ingebjørg, ei ung, vakker og livleg jente som planlegg bryllaup med Jakob då ulukka råkar, Ingebjørg vert spedalsk. Grufullt og hjarteskjerande, men uendelig vakkert skrive.
Forfattaren har klart å få nerve i boka – og ”kjøt og blod” på personane sine. Dei er truverdige for lesaren. Boka er ein flott, sår og trist kjærleikshistorie, så her er det bruk for lommetørkledet. Det er rett og slett ei nydeleg bok, som forfattaren også får mykje ros for av lesarane.
Boka er bygd på ei sann historie då forfattaren skriv om ei gammal tante som vart spedalsk. Ho kan lesast av både ungdom og vaksne, og her i biblioteket står den på begge hyllene.
