Mykje tyder på at engelsk er eit skandinavisk språk.
– Har du tenkt over kor lett det er for oss nordmenn å lære engelsk? seier professor i lingvistikk, Jan Terje Faarlund på Universitetet i Oslo til Aftenposten.
Han meiner ein kan sjå likskap både mellom engelske og norske ord, og ikkje minst i den språklege grunnstrukturen.
– Feil som andre gjer, unngår me fordi grammatikken i stor grad er den same, seier Faarlund.
Faarlund og hans kollega Joseph Emmonds, gjesteprofessor frå Palacky-universitetet i Tsjekkia, meiner dei kan påvise at engelsk i realiteten er eit skandinavisk språk, det vil seie at det tilhøyrer den nordgermanske språkgreina, i lag med norsk, dansk, svensk, islandsk og færøysk.
Dette er heilt nytt, og bryt med det andre språkforskarar har funne tidlegare.
