2012 var eit godt år for Nynorsk kultursentrum. Fleire folk til Haugesenteret vil truleg gje vekst også i 2013.
– 2012 blei eit år for utviding av verksemda til Nynorsk kultursentrum. Vi fekk på plass Språkåret 2013, som er det største prosjektet vårt til no, styrkte driftsavdelingane Aasen-tunet og Hauge-senteret, tok over Allkunne, laga den første internasjonale samarbeidsavtalen og auka både inntekter og gjestetal, seier direktør Ottar Grepstad i ei pressemelding.
Ny leiar
Olav H. Hauge-senteret har no tre stillingar på plass, og det er von om å få tilsett ein fjerde person frå hausten av. Sjølv om senteret formelt ikkje er opna enno, er det også planar om fleire aktivitetar for publikum dette året. Målet er at Haugesenteret skal opne i mai 2014.
– Når dagleg leiar Geir S. Netland er på plass 1. mars, blir den viktigaste oppgåva å skaffe dei millionane vi manglar til basisutstillinga, seier Ottar Grepstad.
Stort prosjekt
Språkåret vart formelt opna av kulturminister Hadia Tajik denne veka, og prosjektet har eit førebels budsjett på 6,7 millionar kroner, melder Aasentunet.
– Målet er at mange ved neste årsskifte skal vite meir og tenkje annleis om språk i Noreg enn dei gjer denne i dag, seier Grepstad om dette prosjektet som er lagt til same år som 100-årsdagen for Det Norske Teatret og 200-årsjubileet for Ivar Aasen.
