Forskning viser at barn med svak språkforståing i barnehagen ikkje tar igjen utviklinga på eiga hand.
– Me har sett på 219 barn frå barnehage til skulealder, og i denne perioden skjer det ingen endring i forhold til kven av barna som har det største eller det lågaste ordforrådet. Forskjellane som blir etablerte i førskulealder, viser ein sterk tendens til å bli verande utover i skulealder, seier forskar Monica Melby-Lervåg til uio.no.
Ho meiner denne kartlegginga bør få store konsekvensar for korleis ein legg opp språkstimuleringa i barnehagane.
– Ordforråd og korleis ein forstår ulike omgrep er avgjerande for korleis barnet presterer i dei fleste teoretiske skulefag. Difor kan forskjellane som blir etablerte i førskulealder få stor betydning for kva læringsutbytte barnet får frå framtidig skulegang.
Alle barna som har vore med i denne kartlegginga er einspråklege, Melby-Lervåg viser til at forskjellane mellom barna viser seg å vere større blant dei som er tospråklege.
