Den nye nasjonale rutedatabasen med konkurransenøytral reiseinformasjon for alle typar kollektivtransport innanlands, inkludert buss, tog, fly og båt, skal vere klar ved årsskiftet.
Vegdirektoratet har fått i oppdrag frå Samferdselsdepartementet å etablere nyskapinga. Ein slik landsdekkjande database finst ikkje i dag.
– Det er eit mål for regjeringa at fleire reiser kollektivt, og at vi bidrar til forenkling og føreseielegheit for næringslivet. Med nasjonal reiseplanleggjar bidrar vi til begge delar. Dei nye retningslinjene for offentleggjering av ruteopplysningar gjer det enklare å planleggje reiser i god tid for reiselivsbransjen og folk flest., seier samferdselsminister Marit Arnstad.
I samarbeid med Ruter og NRK utviklar Statens vegvesen no ein nasjonal trafikkportal for internett og mobiltelefon med informasjon frå den nasjonale rutedatabasen. Portalen skal vere fullt operativ i 2014, men ein testversjon med rutedata frå Austlandet er no tilgjengeleg på www.dit.no.
Den nasjonale rutedatabasen skal vere tilgjengeleg for alle profesjonelle aktørar som ønskjer å tilby reiseplanleggingstenester, inkludert tilbydarar av trafikkportalar på internett eller mobiltelefon. (NPK)
