Kommunal- og regionaldepartementet er flinkast i klassa på nynorsk, i alle fall når ein måler bruken av nynorsk i departementa.
Lova krev at minst 25 prosent av alle offentlege dokument skal kome på nynorsk, og KRD er einaste departement som oppfyller krava i alle tre kategoriane av offentlege dokument som blir målt: ”proposisjonar og meldingar til Stortinget”, ”andre dokument av mindre omfang” og ”andre dokument av større omfang”.
Fiskeri- og kystdepartementet tronar øvst på statistikken viss ein måler gjennomsnittet av desse tre kategoriane, med eit vekta gjennomsnitt på 42,8 prosent nynorsk. Kommunal- og regionaldepartementet har eit vekta gjennomsnitt på 41,2 prosent. Fem andre departement har eit snitt på over 30 prosent, medan ti departement ligg under minstegrensa på 25 prosent. Helse- og omsorgsdepartementet kjem dårlegast ut med berre 7 prosent nynorsk. Tverrsnittet for alle departementa ligg på 22,8, altså under det lova krev.
– Eg vil sende ei oppmoding til statsrådane i departementa som ligg under minstegrensa på 25 prosent om å ta tak i dette og sikre at fleire dokument vert lagt fram på nynorsk. Eit levande nynorsk språk må brukast i det daglege, seier kommunal- og regionalminister Liv Signe Navarsete.
