Hege Jensen (Frp) har fått mykje merksemd over påstanden om at nynorsk kan føre til kriminialitet. Vebjørn Sture i Norsk Målungdom har fått seg ein god latter av saka.
På eitt døgn har Østlendingen si sak om at Hege Jensen, andrekandidat i Hedmark Frp, som meiner at nynorsk kan leie til kriminalitet, vorte delt over 24.000 gongar på Facebook.
– Det kan føre til frustrasjon, dropout og kriminalitet, sa Jensen om nynorsk, til Hamar Arbeiderblad.
Politikaren var særleg uroa for at nynorsk kan leie til integreringsproblem, som igjen kan føre til kriminalitet, skriv Framtida.no
– Eg har snakka med fleire ungdommar med innvandrarbakgrunn om dette. At dei i skulen både må læra seg bokmål og nynorsk skaper frustrasjon. Frustrasjon kan føra til at dei vert leie og droppar ut av skulen. Det eine fører til det andre. Ungdommane har ikkje sagt at nynorsk fører til kriminalitet, men det er tankar eg personleg gjer meg, uttalte Jensen til Østlendingen.
Les også: Meir kriminialitet i bokmålskommunar
Saka har gitt eit skred av kommentarar i sosiale medium som Facebook og Twitter. Leiaren i Målungdommen har sjølv delt saka på sosiale medium og fått seg ein god latter, men slit med kva han skal seie til utspelet.
– Det er sjeldan eg vert målbunden, men at nynorsk leier til meir kriminalitet er ein relativt spesiell ting å påstå, og slik eg har forstått det er det ikkje akkurat tung empiri som ligg bak dette, seier Sture lattermildt til Framtida.no og held fram:
– Eg ser for meg at nokon i Hedmark Frp sit med hovudet i hendene i dag, for dette var ikkje heilt heldig, kommenterer leiaren i Målungdommen, som meiner at utspelet neppe hjelper Jensen til ein stortingsplass.
