Folkebiblioteket vart heidra med ærespris under utdelinga av Brageprisane tysdag kveld. To av dei fire bøkene som fekk pris, er skrivne på nynorsk.
Det knytte seg på førehand spenning til om Dag Solstad skulle få prisen for slektskrøniken «Det uoppløselige episke element i Telemark i perioden 1591-1895», ein roman som har fått svært blanda kritikkar. Men juryen valde ein poet – Ruth Lillegraven og diktsamlinga «Urd», som er på nynorsk. Dei to andre nominerte titlane i denne klassen var også diktsamlingar.
– Viktig pilar
Den gjeve æresprisen gjekk overraskande nok ikkje til ein forfattar, ein omsetjar eller eit forlagsmenneske, men til folkebiblioteket.
– Årets vinnar er ein av våre beste og mest aktive litteraturformidlarar. Vinnaren er omtalt som del av grunnmuren i kulturlivet og ein viktig pilar i eit fungerande demokrati, skriv juryen blant anna i grunngivinga.
Dette er nok ein pris som varma den ferske kulturministeren Thorhild Widvey (H), som var prisutdelar. Då ho la fram endringane i kulturbudsjettet tidlegare denne månaden, var det nettopp med ein lovnad om å satse på folkebiblioteka. Blant anna har den nye regjeringa sett av drygt 12 millionar kroner til å utvikle biblioteka som uavhengige debattarenaer og møteplassar.
Det har berre skjedd éin gong tidlegare at æresprisen ikkje er tildelt ein person. Det skjedde i 2004 då NORLA – Senter for norsk skjønn- og faglitteratur i utlandet fekk prisen. I fjor gjekk prisen til forfattar Knut Faldbakken.
Tegneserie om Munch
Prisen for beste sakprosa gjekk originalt nok til ei bok i tegneserieform – Steffen Kvernelands «Munch».
– I «Munch» fortel Steffen Kverneland på uærbødig vis historia om vår største målar. Kvernelands utgangspunkt er ei rad utvalde sitat frå Edvard Munch og samtidige personar. Desse får han i tale på ein heilt særeigen måte med fortolkande teikningar, som svært ofte legg seg tett opp til Munchs eigne bilete, skriv juryen.
Om Ruth Lillegravens «Urd», som vann den skjønnlitterære prisen, heiter det blant anna at ho «er ei lyrisk-episk diktbok med vidt spenn, langbølga rytmikk og fleirstemt poesi. Gjennom 64 tittellause, nummererte, presise og vâre enkeltdikt organisert i fem delar, skildrar Urd livet og livsinnhaldet til to kvinner med eit hundreår og fleire generasjonar mellom seg».
Brynjulf Jung Tjønn vann Brageprisen for beste barne- og ungdomsbok med «Så vakker du er», også den på nynorsk. Prisen i open klasse, som i år var faktabøker for vaksne, gjekk til «Norsk etymologisk ordbok» av Yann de Caprona.
Brageprisene har vore delt ut sidan 1992 av stiftinga Den norske Bokprisen. Prisane har som føremål å heidre gode norske forfattarskap, og skape interesse for norsk litteratur. Prisane vart delt ut under ei festframsyning i Dansens Hus i Oslo. (©NPK)
