Størst samla auke i Sør-Rogaland.
76.679 elevar i grunnskulen har nynorsk som hovudmål dette skuleåret. Dette er ein nedgang på 298 samanlikna med fjoråret, ifølgje ferske tal frå Utdanningsdirektoratet. Talet på bokmålselevar er 537.451 i år.
QUIZ: Skjønar du bokmål?
I kommunane sør for Sandnes har talet på nynorskelevar gått opp med 117 sidan førre skuleår.
Størst auke er det i Hå kommune der talet på elevar med nynorsk som hovudmål i grunnskulen har gått opp med 78. Kommunen opplever ein stor folkevekst, men ulikt fleire andre vekstkommunar utanfor Stavanger og Bergen er veksten i talet på nynorskelevar større enn talet på bokmålselevar.
– Dette er jo veldig gledeleg, seier Magne Viggo Høyland, leiar i Rogaland mållag. Han seier han er positivt overraska over tala, og har ikkje heilt svar på kvifor det har blitt slik.
LES SISTE NYTT OM NYNORSKEN HER!
– Eg føler nynorsken er meir i vinden fleire stader, seier han. Blant sakene som mållaget jobbar med no er å få fleire kommunar til å bruka nynorsk i norskopplæringa til vaksne innvandrarar.
Hå kommune har no passert naboen Time som kommunen med nest flest nynorskelevar i landet. Framleis tronar Stord på toppen.
I prosent av det totale talet på elevar i kvar kommune, aukar talet på nynorskelevar mest i Nissedal, Fedje og Evje og Hornnes.
I statistikken frå Utdanningsdirektoratet har kommunane Lund, Trysil, Nore og Uvdal og Råde ein stor auke i nynorskelevar, men dette viser seg å vera feilføringar.
