I ein ny rapport blir det foreslått å opprette ein eigen instans for forvalting av kunstnarpolitikken. Instansen er tenkt enten som eit eige organ, eller som ei avdeling under Norsk kulturråd.
Kulturminister Thorhild Widvey (H) fekk onsdag rapporten om kunstnarøkonomien, som skal bidra til å utvikle ein kunstnarpolitikk som konsentrerer seg om etterspørsel og næringspotensial.
Rapporten «Kunstens autonomi og kunstens økonomi» kartlegg økonomien til kunstnarane og drøftar korleis den private delen av kunstmarknaden kan utviklast innanfor område som digitalisering, opphavsrett og entreprenørskap.
– Regjeringa ønskjer ei breiare finansiering av kulturlivet og meir entreprenørskap i kultursektoren, seier statsråden.
Det blir foreslått forenklingar av regelverket for sjølvstendig næringsdrivande.
– I tillegg til ein brei høyring vil vi invitere til innspelsseminar i høyringsperioden, seier Widvey.
Tidlegare nasjonalbibliotekar Vigdis Moe Skarstein har leidd arbeidet med rapporten. Hun har hatt med seg ei referansegruppe med blant andre aktive kunstnarar. Det inkluderer kunstnaren Anne Katrine Dolven, koreografen Jo Strømgren og musikaren Knut Schreiner.
I tillegg har gruppa bestått av gallerist Esperanza Rosales, kulturentreprenør Stein Bjelland, forskar Ellen Aslaksen frå Norsk kulturråd, styreleder Randi Eek Thorsen i Sparebankstiftinga DNB og Christian P. Iversen frå Brønnøysundregistra. (©NPK)
