Erna Solberg og Høgre svarar på kva dei vil med nynorsken i framtida.
Kva vil ditt parti gjere med nynorsken? Høgre vil behalde og vidareutvikle båe målformene.
Kva er partiet ditt si haldning til sidemål? Kultur og språk er grunnlaget for identitet og tilhøyrsle, men også viktig for å forstå andres kultur og religion. Høgre ønskjer eit mangfaldig og variert kulturliv kor flest muleg får høve til å delta og bidra. Målet er at norske kulturutøvarar skal kunne hevde seg i verdsklassa. Høgre vil føre ein politikk som tar vare på og utviklar norsk språk.
Vil ditt parti styrke nynorsk opplæring for innvandrarar? Høgre vil utvide talet på norsktimar i introduksjonsprogrammet til 300, og ytterlegare 300 viss ein ikkje består ein språktest.
Kva meiner ditt parti må gjerast for at skulebøker skal liggje føre på båe målformer til same tid og til same pris? Opplæringslova slår fast at bøker i båe målformer skal vere tilgjengelege for elevane, slik at dei lærer båe språka. Regjeringa har eit klårt ansvar for å sjå til at dette blir etterfølgt i praksis, og eventuelt følgje opp med tiltak dersom dette ikkje skjer.
Finst programmet til ditt parti på nynorsk? Programmet finst både på bokmål/nynorsk samt på lydfilar.
Har ditt parti valmateriell på nynorsk? Vi har noko på nynorsk – ikkje minst sjølve programmet.
Er nettsida dykkar på nynorsk? Nettsidene er i hovudsak på bokmål, men somme av fylka/lokallaga har det på nynorsk. Det er dei einskilde fylkeslag/lokallag som avgjer kva for målform dei ønskjer å bruke.
