Ved utgangen av 2009 var det eitt eller fleire asylmottak i 129 av dei 430 kommunane her i landet.
Det viser UDIs årsrapport for 2009. 16 av dei 129 kommunane dreiv mottaket sjølv, medan resten var vertskommunar for mottak som vart drivne av private aktørar eller frivillige organisasjonar.
Av dei 17.200 menneske som søkte om asyl i Noreg i 2009, fekk 4.500 opphald. Dette utgjorde 42 prosent av alle sakene som UDI realitetsbehandla.
Om lag 2.500 ungdommar som sa at dei var under 18 år, kom til Noreg og søkte asyl utan å ha følgje med foreldre eller andre med foreldreansvar. Dette var ein auke på 76 prosent frå 2008. 840 av ungdommane fekk opphald i fjor.
I tillegg tok Noreg imot 1.110 overføringsflyktningar i 2009. Over halvparten av dei var kvinner. Overføringsflyktningar er flyktningar som ikkje kan vende tilbake til heimlandet, og som ikkje kan få opphald i det landet der dei er flyktningar. Nokre av dei kjem til Noreg etter eit organisert uttak. Dei fleste blir tekne ut i samarbeid med FNs høgkommissær for flyktningar (UNHCR).
I alt 1.020 personar returnerte frivillig i 2009. Det er 79 prosent fleire enn i 2008. I overkant av 3.300 personar vart sende med tvang til heimlandet i 2009. Dette er 44 prosent fleire enn året før. (©NPK)
