Regjeringa føreslår å løyve 13,7 millioner kroner til fleire store nynorsktiltak i statsbudsjettet for 2012. Dette kom fram under ein pressekonferanse på Aasentunet i dag.
– Språket er sjela vår, og vi skal kjenne ein tryggleik for språket vårt, seier Ingrid Heggø (Ap), leiar i Løvebakken Mållag. Saman med Bård Vegar Solhjell (SV) og Ragnhild Aarflot Kalland (Sp) la ho fram nynorskpakken i Ivar Aasen-tunet torsdag.
Den største påplussinga går til Det Norske Teatret (DNT). Dei får 7 millionar kroner til Det Multi Norske, eit kunstnarleg integreringsprosjekt for innvandrarar i scenekunsten. Nynorsk kultursentrum får 2,2 millionar kroner ekstra til å arbeide vidare med planar for eit nasjonalt språkår i 2013 og til å byggje opp Olav H. Hauge-senteret i Ulvik. Hordaland Teater får 1 million kroner til å styrkje arbeidet med scenekunst på nynorsk, og Nynorsk Pressekontor får 500 000 kr til å produsere meir nyheitsstoff på nynorsk. Også Norsk Litteraturfestival, Ryfylkemuseet og Opera Nordfjord får ein særleg auke i 2012.
– På vegner av heile nynorskmiljøert takkar vi for denne satsinga, seier direktør Ottar Grepstad i Nynorsk kultursentrum. – Satsinga svarar godt til det eit samla nynorskmiljø prioriterte i sommar. Det er ei stor oppgåve å styrkje nynorsk skriftkultur, og desse løyvingane kjem svært godt med i det arbeidet, seier Grepstad.
– «Nynorskpakken» er gledelege nyhende også for NU og BUL. Prosjektet Det Multi Norske er ikkje bare eit prosjekt som omhandlar større mangfald på den profesjonelle scena. Dette er ei kopling mellom ein planlagt elevskule på DNT, og vidareføring av «breiddetilbodet» Den Mangfaldige Scenen, som er driven av DNT, BUL og NU. Dette er full pott i forhold til søknaden frå Det Norske Teatret, så det kunne ikkje bli stort betre, jublar generalsekretær i Noregs Ungdomslag (NU), Eli Ulvestad.
