– Me er strålande nøgde, seier dagleg leiar i Nynorsk Avissenter, Ivar Myklebust Longvastøl.
I budsjettforliket har dei borgarlege partia blitt samde om å gå inn for å løyva 2,2 millionar til det eitt år gamle opplæring- og kompetansesenteret i Førde. Det er i tråd med Venstre sitt budsjettforslag.
– Dette er svært gledeleg og heilt avgjerande for vidare drift, seier Ivar Myklebust Longvastø.
Sogn og Fjordane journalistlag er òg nøgde.
– Dette utdanningstilbodet er svært viktig med tanke for ei vidare utvikling av journalistikk med nynorsk språkbakgrunn, og det er svært gledeleg at regjeringa no går inn for å gje 2,2 millionar, skriv Geir Bjarte Hjetland, leiar Sogn og Fjordane journalistlag i ei pressemelding.
– I den situasjonen mediebransjen står i, er satsing på profesjonelle utdanningar med basis i språk og kultur enda viktigare enn tidlegare. Det vil også vere med å gje eit godt rekrutteringsgrunnlag for aviser og andre medier i framtida, held Hjetland fram.
Nynorsk avissenter har så langt vore drive som eit prosjekt med fleire private og offentlege finansieringskjelder. No vert Stiftinga Nynorsk avissenter skipa, med Firda Media, Mediebedriftenes Landsforening (MBL) og Landssamanslutninga av nynorskkommunar (LNK) som stiftarar.
Letta mållagsleiar
Leiar i Noregs Mållag Marit Aakre Tennø er likevel letta for at Venstre og Krf fekk inn pengar til Nynorsk Avissenter.
– Det er viktig å lesa nynorsk kvar dag, og lokalavisene er store tekstprodusentar. Nynorsk Avissenter vil syta for at desse avisene lett kan finna kvalifiserte journalistar, på same måte som Nynorsk Mediesenter har levert nynorskjournalistar til etermedia i ei årrekkje, seier Tennø til NRK Sogn og Fjordane.
Mållagsleiaren er òg glad for at støttepartia fekk reversert dei budsjetterte kutta i pressestøtta.
