I fjor blei 50 millionar kroner ekstra stilt til disposisjon til kommunar ramma av Utøya, men berre nokre få kommunar søkte. Dermed blei 32 millionar ståande urørt.
Leiaren for den nasjonale støttegruppa, Trond Henry Blattmann, kallar kommunanes passivitet ei unnlatingssynd, melder NRK.
– Gi meg den kommunen som får gratispengar og som seier «nei». Den kommunen finst ikkje, normalt sett. Men i denne saka er det slik, seier Blattmann.
Tysdag viser kanalen ein Brennpunkt-dokumentar der dei blant anna følger pengane, som altså i stor grad blei ståande på statens konto. Dei siste 50 millionane kom i tillegg til dei 130 millionar kronene som allereie var delt ut til ramma kommunar. Men den siste potten kom med krav om at kommunane aktivt måtte søkje, og at pengane måtte gå til konkrete tiltak.
– Vi forlangte ei eiga, lita linje som sa at det skal bli rapportert korleis pengane er brukt. Den setninga var nok til at kommunane fall av lasset og valde å ikkje søkje, meiner Blattmann og legg til:
– Her har ikkje kommunane gjort jobben sin. (©NPK)
