I dag fekk Nasjonalt Garborgsenter den store julepresangen: 7 millionar kroner frå dei raudgrøne politikarane.
Onsdag denne veka fekk Garborgsenteret støtte frå ein samla Familie – og kulturkomite på Stortinget. I innstillinga har komiteen følgjande merknad om Nasjonalt Garborgsenter:
”Komiteen mener realiseringen av et Nasjonalt Garborg-senter i Time på Jæren er viktig, og ber Regjeringen holde frem arbeidet med å finne en løsning for å få realisert senteret og utstillingen i tråd med vedtatte planer.”
I dag kom også pengane frå Tippemidlane, via posten: «tilgjengelege spelemidlar til regionale møteplassar og formidlingsarenaer for kultur»
– Me er svært glade for at alle partia har stilt seg bak realiseringa av eit nasjonalt Garborgsenter, seier prosjektleiar Einar Schibevaag som i dag kunne ta i mot pengesjekken frå Magnhild Meltveit Kleppa (Sp), Eirin Sund (Ap), Hallgeir Langeland, (SV) og Geir Pollestad, (Sp).
– Det gir etableringa brei politisk støtte og dermed ein trygg plattform for arbeidet, meiner han.
– Eg var aldri i tvil om at me skulle få dette til, sa Meltveit Kleppe til Stavanger Aftenblad då ho delte ut pengesjekken på Bryne.
Midlane frå regjeringa betyr at arbeidet med å bygge opp innhaldet i senteret no kan halde fram. Meininga er at Nasjonalt Garborgsenter på Bryne skal opne i 2011.
