Allkunne lanserer no ein av dei første nynorske applikasjonane.
Det nynorske, digitale oppslagsverket Allkunne, lanserer no mobilapplikasjonar for iPhone og Android.
– Mobil og nettbrett står i dag for ein stor del av nettbruken. Derfor er det svært viktig å ha nettsider tilpassa plattformene der lesarane er. I fjor lanserte Allkunne mobiltilpassa nettside, og no følgjer vi opp satsinga på mobile plattformer med applikasjonar, seier dagleg leiar Audhild Gregoriusdotter Rotevatn i ei pressemelding.
Allkunne er eit nynorsk digitalt oppslagsverk som inneheld nettstaden rundt 5000 artiklar. Allkunne har fram til i år hovudsakleg konsentrert seg om nynorsk kulturhistorie, men tok i 2012 steget over til å verte eit fullverdig leksikon. Allkunne har i stor grad har satsa på originalskrivne tekstar om personar og institusjonar som elles ikkje finst i andre oppslagsverk. Dei har lagt særleg vekt på personar, institusjonar og organisasjonar, aviser og kommunar knytt til nynorsk skriftkultur og artiklar om språk og språklege emne. No er Allkunne derimot også i gong med å publisere tekstar om andre emne, målet er å etablere seg som eit ålment oppslagsverk.
– Allkunne er eit gratis, digitalt oppslagsverk med kvalitetssikra tekstar. Vi er eit motmaktprosjekt og gir lesarane nynorsk kvalitetstekst, i ei tid der internett fløymer over med usikra informasjon og artiklar. Det er viktig for demokratiet at det finst fleire røyster i det offentlege romet, og Allkunne vil vere der brukarane er, seier Rotevatn.
