Anna Folkestad får Nynorsk barnelitteraturpris 2012 for boka Unni og Gunni reiser.
Juryen meiner at denne tilsynelatande enkle boka er eit viktig bidrag i norsk barnelitteratur gjennom måten ho introduserer forteljande dikting for dei yngste lesarane på. Dei peikar vidare på at boka er eit viktig bidrag til ein barnelitterær sjanger som har vore prega av omsette bøker, og meiner Folkestad skal ha heider for å ta lesargruppa si på alvor ved å skape gode kvalitetsbøker.
– Denne tilsynelatande enkle boka er eit viktig bidrag i norsk barnelitteratur gjennom måten den introduserer forteljande dikting for dei yngste lesarane på. Også dei andre bøkene og appane om Unni og Gunni stadfestar inntrykket frå vinnarboka om at prisvinnaren har greidd å skape eit barnebokunivers med stort potensial.
Boka er gjeven ut på Det Norske Samlaget.
Noregs Mållag har delt ut Nynorsk barnelitteraturpris sidan 1968. Prisen er på 30 000 kroner og ein diplom. I juryen har Anne Marit Godal, Arild Torvund Olsen og Anne Skaret sete.
