Det står ikkje så dårleg til med kultursatsinga i kommunenoreg som gårsdagens oppslag kunne tyde på.
I går kunne vi lese at kommunenoreg i liten grad fekk merke noko til Kulturløftet, og at kommunane brukte mindre på kultur no enn for fem-seks år sidan. Saken hadde sitt opphav i Aftenposten, som hadde lagt KOSTRA-tal for perioden 2006 til 2010 til grunn. Men i dag vedgår Aftenposten at tala som er brukt ikkje er samanliknbare, og at kommunane sin del av kulturmidlane i realiteten har vore stabil, ikkje synkande. Forklaringa er at kommunane sin andel av kulturmidlane i 2006 også innbefatta midlar til kyrkje- og andre religiøse føremål, medan desse tala var trekte ut i 2010-statistikken. Dermed vart desse åra ikkje samanliknbare, og grunnlaget for å seie at kommunane brukte mindre på kulturføremål vart feil.
Nettavisa Minerva har sett nærmare på tala som er lagt til grunn i saken og slår fast at kommunane snarare brukte meire pengar på kultur desse åra, ikkje mindre.
Framtida.no har sett nærmare på kommunane si satsing, og finn at Oslo kommune i 2006 prioriterte kultur lågare enn landsgjennomsnittet, men har tatt seg best opp i åra etter.
