Unge som opplever at dei har det bra i liva sine, gjer det også betre på skulen, kjem det fram i ein ny rapport.
Nesten 4.000 11-, 13- og 15-åringar i heile Noreg er med i granskinga. Ho viser at livsglede, det å ha det bra i livet, har stor verdi for både skuletrivsel og skuleprestasjonar.
Rapporten som viser dette, «Sammenhengen mellom psykisk helse, skolemiljø, skoletrivsel og skoleprestasjoner», er skriven for Kunnskapsdepartementet av professor Oddrun Samdal ved Universitetet i Bergen.
Rapporten viser også at 90 prosent seier dei er over gjennomsnittet tilfredse med livet.
– Det er positive tal, og også tala for skuletrivsel er høge i Noreg, seier Samdal til Avisenes Nyhetsbyrå (ANB).
Helseåtferda til elevane har også verdi. Rapporten viser til dømes at 15-åringane treivst betre på skulen dersom dei var regelmessig aktive utanom skulen. Dei som var aktive hadde også mindre sannsynlegdom for lågare skuleprestasjonar. (©NPK)
