Framlegget frå Sauda Høgre om å melde kommunen ut av Landssamanslutninga av nynorskkommunar fekk ikkje fleirtal, og Sauda forblir medlem av LNK.
Det var i samband med budsjetthandsaminga at Høgre føreslo å melde Sauda kommune ut av LNK for å spare pengar. Kommunestyret hadde saka til handsaming 12. desember i år, og Høgre fekk då ikkje resten av kommunestyret med seg på å melde kommunen ut av LNK.
Då LNK tok saka opp med varaordførar Laura Seltveit (Ap), som også sit i styret til LNK, før kommunestyremøtet, understreka ho kor viktig den språklege identiteten til kommunen er.
– Som medlemskommune i LNK får me jo tilbod om gratisk språkkurs for tilsette i kommunen, det ville kommunen spart mykje på. Eg meiner nynorsken er ein viktig del av identiteten vår og me skal ikkje gløyme at skulane våre er nynorskskular, sa Seltveit.
