Oddmund L. Hoel gir no ut ny bok om målreising.
Det er doktoravhandlinga til Hoel som no kjem ut i bokform på Samlaget. Boka “Mål og modernisering. 1868-1940. Norsk målreising” blir lansert på nynorsk fagdag som Ivar Aasen-instituttet inviterer til i Oslo i februar.
– Eg stiller spørsmålet om kvifor nynorsk har opplevd sterk framgang i bygdene, men ikkje kom seg inn i byane. Det er eit problem eg prøver å forstå og forklara, seier Hoel til Sogn Avis.
Avhandlinga er den første større granskinga av korleis den nynorske målrørsla tok del i moderniseringa av samfunnet frå 1880-åra og fram til andre verdskrig, skriv Sogn Avis.
